مشوار ركشة داخل الخرطوم بي 12 مليون ونص !!

مشوار ركشة داخل الخرطوم بي 12 مليون ونص !!

بقولوا في المثل السوداني النيه زاملت سيدا .. حكى لي صديق مدير منظمة كيف إنو إنتقل من سائق ركشة لي مدير منظمة ناجحة .. القصة كانت قبل سنوات زول خريج جامعي ما لاقي شغل وزول جواهو خير كبير (النوع البحب الناس داك) يفرح لمن يخدم زول .

تلقاهو في المقابر اول زول يسوق شباب الحلة ويمشوا يحفروا .. في الصيوان يخدم الضيوف .. شايل قمح الحاجة جارتو موديهو الطاحونة .. ايام ازمة الغاز تلقاهو شايل انابيب الجيران في ركشتو يفتش ليهم .

المهم كان ولد خالتو اساسا كسر رجلو في الكورة وأداهو ركشتو قال ليهو تشتغل بيها .. زول حساس اي زول يركب معاهو والبديهو ليهو يشكرو حتى لو ما كان تمن المشوار .

كتير كان برجع البيت جيبو فاضي بعد يدي ود خالتو قروشو لكن بكون مرتاح نفسيا ..
القصة وين ؟ هي سلسلة الإدهاش الرباني في حياتك بتبدأ بي موقف / حركة / فعل / شي مابتتوقعوا وبغير حياتك .

ذات يوم جات حبوبتك في الكلاكلة اللفة في صف ركشات وتقيف تتكلم مع الواحد وتمشي للبعدو .. كلهم رفضوا يودوها .

زولنا شافا زعلانه ناداها (تعالي يا أمي) ماشه وين ؟ والله ياولدي ماشه أبو آدم أنا إشتريت الخدار دا واللحمة وقروشي نقصت وكلهم قالوا إلا بي 8 جنيه .. وانا عندي 5 جنيه بس .. لا مافي مشكلة اركبي يمه معليش هم عشان ما ركشاتم لكن دي ركشتي بوديك مجان .. (شوفوا اخلاق الزول دا يبرر للتانين شان يطيب خاطرا) !!

لمن وصلوا قدام بيت الحاجة عاوز يقيف لقى تكسي واقف فوقو شنط سفرية .. فجأة شاب ينزل من التاكسي وجا جاري على الركشه ونزلت أمو وإتعانقوا وبكاء شديد وفرح .. طوالي عاوز يتحرك راجي الحاجة تشيل كيسا ف تقوم تقول لي ولدا يا ولدي سلم علي اخوك بتاع الركشة دا .. والله الاولاد كعبين ابو يجيبوني وقت نقصت قروشي هو قال لي يا امي تعالي بوديك بلا قروش لمن شافني متمحنه وبقت تبكي .. هنا ولد الحاجة نزلوا وعانقوا وربت على ضهروا شديد قرب يكسرو 😂😂 شكرو شديد على مرؤتو وشهامتو .. وقبل ما يدور الركشة حلف عليهو مايقول شي طلع جزلانو ودخل ليهو في جيبو الفوق قروش .. وصل اللفة وقف في الصف طلع القروش لقاها الف ريال سعودي .

قعد يضحك لانو ما إتوقع المبلغ يكون كبير كدا .. القصة إنتهت ؟

لااااا كان شبطو معذبو وبخيطو كل مرة .. مشا فكا القروش طلعت 12 مليون ونص .. مشوار بتاع (8جنيه) !! اكرم الحاجة دي فربنا أكرموا .. قسم مع ود خالتو نص المبلغ بإعتبار دي ركشتو .. باقي المبلغ عمل بيهو شنو ؟ فكر في المساكين .. بقى يشتري بلح وسكر و خبز كل صباح يوزعا في أكياس ويشيلا في ضهر ركشتو والمساكين اليلاقوهو خلال اليوم يديهم كيس .. قال لي كنت بتمنى ربنا يديني ماعون رزق كبير شان اساعد مساكين اكتر لانو مرات بحزن لمن تنتهي الأكياس وارجع وفي ناس ما قدرتا اديهم فكنت بقول (يااااا الله ماعون كبير ) ولأنو قانون ربنا (يمحق الله الربا ويربي الصدقات) ربنا قال ليهو وليه لا ؟ الحصل شنو من عطفو ورحمتو بالمساكين ديل ؟

في عمك رأسمالي كبير عندو مغالق كبيرة كان بصادف يلمحوا بوزع الأكياس .. مرة وقفو وسألوا قال ليهو إنت بتوزع الأكياس دي للمساكين بتجيبا من وين ؟ فقال ليهو ديل ناس محسنين وما وراهو مصدرا الحقيقي (خفيه)

عمك قال ليهو عاوزك ضروري تجيني بكرة .. في مكتب عمك الوثير عرف منو إنو صديقنا خريج الجامعة الأهليه ترجمه وما لقى شغل فأشتغل بالركشة .. عمك قال ليهو شوف يا ولدي إنت زول كويس في زمن صعب وانا راقبتك من كم يوم وسألتا عنك ناس الركشات قبل اناديك .. وشوف انا والله مليان قروش تب بس مشكلتي ما لقيت زول أثق فيهو وانا اي زول شغلتو في منظمتي دي ماكان امين حتى اصدقاء مقربين .. انا عاوزك مدير للمنظمة دي وبديك مرتب كويس وعربية تتحرك بيها .. تم الإتفاق .. هو بإنسانيته وأمانتو وأخلاقو وعمك بي قروشو وصدقاتو الجارية .

قال لي البيحير إنو عمك برفض نذكر إسمو في المشاريع النفذناها .. منظمة تعول الآلآف من اليتامى والأرامل والمحتاجين لا احد يعرف من هذا الذي ينفق !!

سألني صديقي دا ( اها عليك الله عمك دا مش احسن مني ؟ ياخ انا في الواجهة ) !! فقلت ليهو والله عمك عجيب وولد الحاجة الأداك الف ريال عجيب وإنت اعجب منهم كلهم .. ناس رجال وإنسانيين وحنينين وسودانيين قبل دا ..

يا ناس لينوا قلوبكم على خلق الله .. إتوكلوا .. سامحوا .. إتعافوا .. وخلي علاقتك بربنا قوية واطلب من الأمروا في كسر من الثانية (كن فيكن)
تمسك في ربنا قوي يسخر ليك الكون كلو_بي خلقو وخيراتو ..

جغمة اخيرة : بلدنا لمن تنجب رجال زي صديقي دا وولد الحاجة الكريم وعمك المتصدق دا بتسد الفظائع البتحصل من وحوش آدميين تانين وبتجيب رحمة ربنا .

اذا اعجبك الموضوع يمكنك مشاركته مع أصدقائك منقوووول

5 thoughts on “مشوار ركشة داخل الخرطوم بي 12 مليون ونص !!

اترك تعليقاً

لن يتم نشر عنوان بريدك الإلكتروني.